Yn shong jingialang ki Rangbah Shnong halor ka rai ka High Court

Shillong, 15 K’lyngkot:
Ka Synjuk ki Nong synshar Shnong ka Bri U Hynniewtrep (SNSBH) Ri Khasi Jaintia ka la rai ban pynlong ia ka jingialang jong ka Synjuk ha ka 21 tarik Kyllalyngkot 2016 ha Community  Hall Wahingdoh, Shillong ha ka por 11 baje mynstep ban ia mir jingmut halor kine ki mat  kiba iadei bad ka rai jong ka Meghalaya High Court, ka jing pynkylla ia ka Rule 20 (B) jong ka Meghalaya Services (Conduct) Rules 1990 kaba la pynmih da ka Sorkar lyngba ki kotkhu bor ka ba pyrshah ia ki nongtrei kam Sorkar ban kit ia ki kam Shnong bad kiwei kiwei de. Ia kane la pynlait da u general secretary ka SNSBH u Bah Rapiong L Blah.
Ka Synjuk ka kyrmen ba ki Nongsynshar/Rangbah Shnong bad ki nongkit kam shnong kin pyllait por khnang khnang ban ia poi sha kane ka jingialang bad ha kajuh ka por ka Synjuk ka kyrpad ban shim ia kane ka kyrwoh kum ka jingpyntip namar ba la khim palat ka por ban pyntip sha man la ka Dorbar Shnong da kawei pat ka lad.