Hapoh ar kynta, hukum ka High Court ban thung Public prosecutor

Shillong, 15 Jymmang:
Ka High Court mynta ka sngi ka la hukum ia ka sorkar jylla ba kan thung noh hapoh ar kynta ia u Public Prosecutor na ka bynta ban iarap ia ka sorkar, ia ki mukotduma runar (criminal).
Kane ka hukum ka High court ka long hadien ba ka la don ka jingbishar ia ka mukotduma jong u Tenderly Hynniewta bad u Small Phawa kiba la kyrpad sha ka Kashari hadien ba la shah rai pynrem, ba kan pynduna ia ka jingshah pynshitom.
Hynrei ia kum kane ka mukotduma, ki advocate ka sorkar kim lah ban iasaid namar ba ki kam jongki, ka long beit tang ban iasaid ia ki kam paidbah ne civil case.
Na ka bynta ka kam runar, ka sorkar ka donkam ia u public prosecutor ban iasaid ia ki mukotduma runar.
Ka Kashari ka la ai por haduh 2 baje ban rai ban thung ia u Public Prosecutor bad katkum ka tyllong khubor, ka sorkar jylla ka la pan por haduh janmiet ban rai halor kane ka kam.
Ha kawei ka liang, ka sorkar ka la dei ban thaw ia ka Directorate of Prosecution hynrei kam pat shym la leh ia kane haduh mynta. Kane ka rai ka Kashari ka la mih mynta ka sngi hadien ka jingkyrpad jong ki ar ngut kiba shah rai pynrem ha ki kashari ba kham rit hadien ba u nongsaid jong u Tenderly Hynniewta u dei ba donkti ban pyniap ia ka samla jongu ha ki snem ba la dep bad kumjuh u Small Phawa uba shah rai pynrem halor ki kam batbor ia ka khynnah 14 snem.
Ia u Public Prosecutor dei ban thung da ka sorkar ha ka jingiasyllok lang bad ka High Court.