Nongstoiñ, 14 Jymmang:
Ki seng kynthei jong ka HSPDP, ki la khie bitar jur ia U Bah Diostarness Jyndiang MLA jong ka Nongstoin, ba um shym la lum la lang ia ki, na ka bynta ban iakren ia ka tiket jong ka elekshon MLA 2018, hynrei, u la shu leit sop sop pat ialade ban thep kyrteng biang kum u kandidet jong ka Nongstoin, na bynta ka elekshon, ka ban sa wan.
Katei ka shnat jong ki kynthei, hapoh ka jingialam jong ka kong S. Thongni President bad kong P.F. Marngar Secreatary, ki la ther tyngeh ia u bah Diostarness Jyndiang, MLA jong ka Nongstoiñ Konstitwensi, ba um shym la lum ia ka jingialang paidbah kaba kynthup lang ïa ki rangbah bad longkmie ia kaba u la dep ban kular naduh ka 28 tarik u Rymphang 2017.
Ha ka jingialang paidbah (General Meeting), ba la pynlong da ka HSPDP Women’s Wing Nongstoiñ Area Unit, hynnin ka sngi kiba bun ki nongkren haba ai jingkren ki la pynpaw ïa ka jingbynñiaw ïa u President jong ka Nongstoiñ Area Unit, namar ka jingbym lah ka jong u ban lum ia ka jingialang paidbah na ka bynta ban khot application ia ki Kandidet kiba kwah ban iakhun ia ka Election ha u 2018.
Katba katei ka jingialang ka la iaid la mar shiteng bad shwa ban poi noh artad sha kaba kut U MLA ka Nongstoiñ u ba dei ruh u President ka HSPDP Nongstoiñ Area Unit, u la wan poi ha katei ka jingialang bad na ka liang jong ki nongialam jong ka Women’s Wing ki la iohlad ruh ban ther markhmat ia u tei u MLA bad pan ruh ia ka jingpynshai halor ka jingbym lah jong u ban lum ia ka jingialang paidbah bad kumjuh ha kaba iadei bad ka jingleit aplai tiket sop sop ialade.
Haba pynshai ia kitei ki jingkylli u bah Diostar Jyndiang u la ong ba naduh ka 28 tarik u bnai Rymphang hadien ba la don ki briew kiba la sdang ban pynthut ïa ka jingïalang jong ki dkhot jong ka party, te na ka liang jong ka seng, ka la ïa shong ban ïa pyrkhat bha bin pa bin ïa ka jinglong jingman ban lap ruh ïa ki briew kiba la pyrshang ban ïalam bakla bad ban pynthohbria ruh ïa ka seng baroh kawei, kaba la pynlong ruh ban pynsahteng ia ka jingthmu ban lum ia ka jingialang paidbah kumba ki kwah.
Haba ïadei bad ka kam election u bah Jyndiang u la ong “Ka kam Election kadei ka kam jong ka Central body ha kaba ngi la don ia ka State Election Committee bad yn da ki la bthah ïa ngi ba ngin leh ïa kaba donkam hangta ngin sa leh ïa ki jingdonkam bad halor kane ka kam ka shong ruh ha ka bor jong ka jingpyniaid jong katei ka committee na ka liang ka jong nga kum u President ngam lah ban ai shibun ka pynshai”.
Hadien katei ka jingialang u nongthoh khubor u la iohlad ruh ban iakren bad ka kong P.F. Marngar Secretary HSPDP Women’s Wing Nongstoiñ Area Unit, ha kaba ka la ong ruh ba ka la ioh jingtip ba u MLA u ba dei ruh u President jong ka Nongstoiñ Area Unit, u la dep ban phah applikeshon sha ka central boby na ka bynta ban pan tiket ia lade ban iakhun ia ka Election 2018.
Bad ka la ong ruh ba katei ka jingleh jong u MLA khlem ka jingpyntip sha ki paidbah ka long kaba bakla shibun namar ha ka jingshisha lada u kwah ban ïakhun ia ka Election ruh u lah dei ban wan shwa ban pyntip ïa ngi ki paitbah bad ki paitbah kin sa ai ia ka rai la ki la ibit ne em ïa u ba un dang ïakhun biang, ym ba un shu leh sop sop.
“Lada bakla ka jingai ïa ka tiket ha Nongstoiñ ngin khylliap lama noh ïa ka HSPDP ha Nongstoiñ hi baroh kawei bad lada ka HSPDP kan duhjait na Nongstoiñ ngam tharai ba kiwei pat kiba na kiwei ki Konstitwensi ba kin dang im biang namar ka Nongstoiñ ka dei u budlum jong ka HSPDP”, ong ka kong P.F. Marngar.
Kaba ka la bynrap shuh shuh ba ka jingialang, ka la rai ba kan thoh noh ïa ka shithi sha u President ka Nongstoiñ Area Unit ba un lum noh mardor ïa ka jingïalang paitbah bad lada um leh ei ei kumta kin phah ruh ïa ka shithi sha u President ba Rangbah duh jong ka Party, bad lada u President rangbah u don ïa ka mynsiem ka jingpyrkhat na ka bynta u paitbah u dei ban phah ïa u President ka Nongstoiñ area Unit, ba un lum noh mardor ïa ka jingialang khnang ba kin ïoh ruh ban tip ba ïano yn ai ïa ka tiket.
↧
Na ka tiket MLA Nongstoin, byrngem khylliap lama ki kynthei HSPDP
↧