U Bah Wankupar, kandidet UDP na Nongspung-Sohiong

Shillong, 12 Risaw:
Ka jingialang jong ka Election Committee ka East Khasi Hills kaba lon dang shen, ka la jied ia u Bah Wankupar Syiemlieh kum u kyrtong ban iakhun na Nongspung-Sohiong ha kane ka elekshon MDC shiteng samoi ban long ha ka 13 tarik Nohprah.
“Napdeng ki san ngut kiba la pan tiket, ngi la jied ia u Bah Wankupar Syiemlieh ban long u kyrtong bad ia ka kyrteng jongu, la phah sha ka Central Election Committee ka seng kmie ban ioh ia ka jingmynjur”, la ong u President ka UDP East Khasi Hills u Bah TW Chyne mynta ka sngi.
Ki don san ngut ki kyrtong kiba pan tiket ia ka UDP na Nongspung-Sohiong ha kane ka elekshon ba kynthup ia u Bah Philemon Kharmyndai, Bah Braston Kharphuli uba la ialeh MLA teng, u Bah Wankupar Syiemlieh, u Bah Fedrick Lyngkhoi u director barim ka MBOSE, bad u Bah RA Lyngdoh ba long teng u MLA ka Sohiong.
U Bah Chyne u la ong ba ka jingjied ia u Bah Wankupar ka long hadien ba la ioh ia ka jingiabeit lang jong baroh ki kyrtong kiba la pan tiket ba ki kloi ban kyrshan ia u kum u kyrtong ha kane ka elekshon ban wan shen.
“Ngi la poi sha ka jingiapynbeit bad iasngewthuh jingmut baroh ki kyrtong ban pynskhem ia ka kyrteng u Bah Wankupar Syiemlieh kum u kyrtong ka party na Nongspung-Sohiong konstitwensi ha kane ka elekshon ban wan”, la ong u Bah Chyne.
U la pyntip ruh ba ka seng kan pynlong ia ka jingialang bah jongka ha Sohiong ha ka 22 tarik mynta u bnai ha kaba ki nongialam na ka seng kmie kin hiar ban ai ia ka jingpynshai sha ki paidbah ha katei ka sngi.