Weng ka liangpyrshah, ia ka jingbym shaniah ia u Lamphang

Shillong, 16 Nailur:
Hadien ba ka Liangpyrshah ka la weng noh ia ka jing bym shaniah shuh, pyrshah ia ka sorkar hynnin ka sngi, mynta ka sngi kaba dei ruh ka sngi kut ka dorbar synrai, ka la weng noh ia ka jing tyrwa bym shaniah shuh pyrshah ia u Lamphang ka iing dorbar u AT Mondal.
Kane ka jingweng noh ka Liangpyrshah ia ka mat jing bym shaniah shuh, pyrshah ia u Lamphang ka long hadien ba ka la shah shet hynnin ka sngi ha ki dkhot ka Liangsynshar.
Jin lada ki MLA ka liangsynshar kim kylla ktien, ka sorkar ba ialam da u Dr Mukul hynnin ka la don hapdeng ka saw ka sian ban khyllem syndon bad kan long kaba suk ia ka Liangpyrshah ban pynkhyllem sa ia u Lamphang kaba la buh ban long mynta ka sngi.
Na ka liang u James K Sangma uba rah ia ka mat ban pyrshah ia u Lamphang ha ka 12 tarik, u la pynher shithi noh hynnin ka sngi sha u Lamphang ba um don mon shuh ban rah ia ka mat pyrshah ia u Lamphang, kaba la pynbna kham mynshwa ban pynlong ia ka jingiatynjuh bor hynne ka sngi.
“Nga la ioh ia ka shithi na u James K Sangma hynnin ka sngi, kaba pynpaw ba u dkhot u la weng noh ban rah ia ka NCM pyrshah ia u Lamphang”, la pynbna u Mondal mynta ka sngi ha ka iing dorbar.
Ka jingbym treh ka liangpyrshah ban rah ia ka mat bym shaniah, ia u Lamphang, ka la kham pynthanda shuh shuh jai ia u Myntri Rangbah uba la ktha khlieh kumno ban iakhun pyrshah ia kane ka buit jong ka liangpyrshah.
Katkum ka khubor, la iathuh ba ka daw ka jingbym treh shuh ka liangpyrshah ban rah da ka NCM pyrshah ia u Lamphang ka dei hadien ba ka la sngewthuh shai ba ki MLA na ka liangsynshar kiba la kular ban ai jingkyrshan mynshwa hynrei mynta ki la kynran dien noh.
Ar ngut ki MLA shimet na Garo Hills kynthup u John Leslee K Sangma bad u Saleng A Sangma, kiba don ha ka liangpyrshah ha kine snem ba la dep, ki la pep ha ka jingiatynjuh bor hynnin ka sngi bad mynta ruh.
U Myntri Rangbah u Dr Mukul Sangma u la ai ksai ba ka sorkar ka lah ban ai kam ia ki ne ban khot ban wan iasoh bad ka liangsynshar.