Shillong, 16 Nailur:
Ka jingshah bat tnga jubor jong kawei ka khynnah kaba dang 10 snem karta ka la paw pyrthei noh hadien 5 snem. Katei ka jingpaw pyrthei ka dei hadien ka jingleit ujor kiba haing hasem jong katei ka khynnah sha ki pulit bad ka la kham shai shuh shuh hadien ba ka kmie jong ka ka la wan ban kren sha ki nongthohkhubor mynta ka sngi.
Katkum ka jingiathuh ka kmie jong katei ka khynnah ka kong Julaidaris Nongbsap ka la ong ba ka khun jong ka kaba dang 10 snem karta ka la shah leh be-i-jot ha la u jong u paduh uba la tip kyrteng kum u bah Lampher Kharpan,50 karta ha u snem 2011.
Ka kong Julaidaris ka la iathuh ba ia katei ka kam utei u Paduh uba dei ruh u tymmenbasan jong ka balang Presbyterian ha Kreit , Shilliang Um. u la leh ha ka por ba ki dang ia shong iasah ha ka shnong Kreit, Shilliangum kata ha u snem 2010-2011.
Katei ka longkmie ka la iathuh ba utei u nongbatbor u dei u lok jong ka para khadduh jong ka –ka Mombrisoh Nongbsap bad ki ju khot ia u –u ‘Paduh’. Ka la ong ba namarba kim don khun,ka la ai ia ka khun jong ka ha ki ha u snem 2009 ba kin ri kin sumar. Ka la iathuh ba ia katei ka kam ka la tip hadien ka jingphla ka khun jong ka ha ka ha u rymphang, 2015.
Ka kong Judai ka la iathuh ba katkum ka jingphla ka khun jong ka, utei u paduh u la sdang ban leh khlem akor naduh u snem 2010 hynrei dei ha u 2011 ba u la pynjot syndon ia ka ha ka por ba ka dang don 10 snem 3 bnai.
Watla kattei ruh kam shym pat la paw pyrthei , dei ha ka por ba ki la mih noh na Kreit ban leit sah sha Lummawbah ha u snem 2012 ba kiei kiei baroh ki la sdang paw namarba ka khun jong ka –ka la ioh pang khah khah bad ka la ioh ruh ka jingpang iap ler, ka la ong ba ha u 2015 ki la mih noh na Lummawbah ban leit sah sha Jaiaw Laitdom bad dei hangtei ba ka khun jong ka –ka la shitom jur bad hangtei ka la phla lut ia ki jingjia baroh.
Ka kong Judai ka la iathuh ba ka la sdang ban kylli tohkit bha na ka khun lajong kumno katei ka jingjia ka jia bad ka la iathuh ba u paduh jong ka u ju buh da u khulom ring dur ha kamra sum ha ka por ba ka sum ( Spy Pen Camera) bad u ju leit sha jaka ba ka thiah ha ka por ba ka ioh thiah bad ka tang shu kyndit u phet noh.
Tang mar ia tip ia kitei kiei kiei baroh ka kong Judai ka la ong ba ka la leit ban kylli bha na ka para lajong ka kong Mombrisoh hynrei ka la ong ba ka para jong ka ka iashah pynban ia lau lok bad ka la kynnoh ruh ba ka dei tang ka jingthmu ban pynthohbria ia u.
Ka kong Judai ka la thoh sha ka Balang ha ka 9 tarik u jylliew, 2015 ban pyntip shaphang ki kam jong ute iu tymmenbasan bad la ot balang ia u hadien ba u la phla dalade hi ha ka ba u leh ia katei ka kam.
Ha ka 12 tarik mynta u bnai ka la ujor ejahar sha ki pulit bad ki pulit ki laleit wad ban kem ia u hynrei baroh ar ngut shi lok ki la phet krad noh. Halor katei ka jingjia ka CSWO hapoh ka jingialam ka President kong Irene Hujon ka la pynrem jur bad ka la kyntu ia ki bor ka aiñ ban pynshitom ia utei u Paduh.
↧
U Paduh bat bor khunruid, ula ieh ia ka kam Tymmenbasan
↧