Shillong, 16 Nailur:
U Myntri Rangbah ka jylla u Dr Mukul Sangma u la ong ba ka jingong ba ka sorkar pdeng kan ker sainar shiah naduh maw pud, ka dei kaba bakla bad kam don satia kum kata ka jingbthah na ka sorkar pdeng ha kaba iadei ban ker sainar shiah ha ki khappud ka India bad Bangladesh.
Haba jubab ia ka phang halor kane ba la wanrah da u MLA ka Nongkrem u Bah Ardent M Basaiawmoit, u Dr Mukul u la ong, “Ka tnad kam pohiing ka ri India kam shym la ai kano kano ka jingbthah ia ka sorkar jylla ban ker sainar shiah na zero line”.
Hynrei u la ong ba ka la don ka jingpynbeit hapdeng ka sorkar India bad ka sorkar Bangladesh ba lada don ki shnong ba hapoh ka jingjngai ka 150 yard ne u maw pud, dei ban ker sainar shiah sha lyndet kata ka shnong bad ka jingker sainar shiah ha kata ka jaka, dei ban long tang kawei ka kynroh sainar.
“Ia kane la pdiang ka sorkar India bad ka sorkar Bangladesh ban ailad ba kito ki shnong ba don hapoh kane ka jingthew 150 yard, yn ker na u maw pud, hynrei kiwei ki jaka bym don shnong, ka jingker sainar kan long beit 150 yard na u Zero line bad ym lah ban iakren da kumwei pat”, la ong u Myntri Rangbah.
U Dr Mukul u la ong ba ka jylla Meghalaya ka don 443 km ka jingjrong jong u khappud bad ka Bangladesh naduh Boldamgre ka West Garo Hills haduh Ratachera ha East Jaintia Hills district.
U la ong ba ka jingker sainar shiah hapdeng jong kine ki ri ka long katkum ka Joint India-Bangladesh Guidline for Border Aurhorities ba la mynjur ha u snem 1975 ha kaba la pdiang ba lada kine ki ar tylli ki ri ki donkam ban ker sainar kan long beit naduh 150 yard na u Zero line jong baroh ar tylli kine ki ri.
↧
Ka jingong ban ker sainar na maw pud kaba bakla, ong U Mukul
↧