60 hajar ngut, kiba wan peit ia ka Sa Shisien

Shillong, 11 Nohprah:
Haduh mynta ki ladon kumba 60 hajar ngut ki paidbah kiba la wan peitkai ia ka phlim khasi ka ‘Sa Shisien’ kaba dang iaid mynta ha Bijou Cinema Hall kaba don ha Khyndailad. Ia katei ka jingkhein u nongshna jong katei ka phlim u bah Commander Shangpliang u la ong ba la ioh katkum ka jingdie ia ki tiket. Utei u nongshna ia katei ka phlim u la pyntip ruh sha kipaidbah ba ka tarik ba khadduh ban pynkut noh ia katei ka phlim ha Bijou kan long ha ka 17 tarik mynta u bnai. U bah Command u la ong ba ha ka sngi ba nyngkong ba la pyni ia katei ka phlim ki la don 900 ngut ki paidbah ba la wan peit hynrei katba nangmih ki sngi ka poi tang kumba 500 ngut ha ka shisngi.
Hynrei na ka liang utei u nongshna phlim u la kren diaw mynsiem namarba u la ioh jingujor na ki paidbah ba ki don ki riew shim kabu kiba kamai spah narud da kaba die Black ia ka tiket ha ka dor T.300 tyngka, u la pyntip paidbah ba ka dor shisha na ka bynta kito kiba kwah ban peit ia katei ka phlim kan dei T.60 tyngka na ka bynta ka Balcony katba T.40 tyngka ia First Class.U bah Commander u la iathuh ba un ym pyllait satia ia kane ka phlim ha ki Compact Disc kumba ju leh ia kiwei kiwei pat ki phlim bad kyntu ia ki paidbah lada ki kwah ban iohi ia kane ka phlim kin sngewbha ban wan peit ha Bijou Cinema. Na ka liang u tyngshop bad ka puron jong kane ka phlim, ba kynthup ia u Bah Phira bad Kong Tracy ki ai khublei ia ki paidbah kiba wan ai jingkyrshan ia kane ka phlim da kaba wan sakhi ha Cinema bad kyntu ia ki paidbah ban ym kopi tuh na ki mobile ne leh kino kino ki kam kiba long be-aiñ.