Shah thok haduh 4 lak tam uba kwah kam sorkar

Jowai, 18 Nailar:
Uwei u briew na ka shnong Jalaphet, East Jaintia Hills uba la tip kyrteng kum u Broming Bareh u la shah thok haduh 4 lakh 30 hajar ha uwei Heimon Malang, uba kam ba udei u Pynio Dkhar bad trei kum u Sahep (Officer) ka tnad Forest jong ka sorkar Meghalaya uba la kular ban aikam driver ia utei u Broming Bareh uba nang ban niah kali hynrei u bym don jingstad jingtip bad ruh ban thung kam LDA ia ka para ba la nang la stad jong u hapoh ka tnad Forest.
Utei u ma Broming Bareh u la ai ia katei ka pisa ha phyllaw ka DC Ophis Shillong ha kine ki sngi ba ladep bad hadien ba u la sngewthuh ba u la shah thok, u la leit ban ujor sha ki pulit ka jylla ha Sardar Police Station, Lumdiengjri, Shillong.
U Heimon Malang udei u snar kamai pisa da kaba thok ia ki samla wad kam sorkar. Baroh baroh ki ia kwah kam sorkar ba udei u briew u la shim kabu ia kane ka jingkwah kam sorkar jong ki samla ka jylla.
U la shah kem bun bun sien bad u la thok ia ki bun bun phew ngut bad kamai ruh da ki phew lakh tyngka na kylla ka ri lum Khasi Jaintia.
U don ki kes ha Jowai, Khliehriat bad Shillong. Ha Jowai u don ruh ka kes Bat tnga jubor. Une u briew u la thok wat ia uwei u MDC ka JHADC ha ka por ba u dang pule BSc year ban pyniohkam hapoh ka tnad Soil and Water Conservation.
U ju kam ba u dei u Officer jong ki tnad Sorkar bapher bapher bad u la leh ia kane ka ka kamai pisa naduh ki snem 2010-11 bad u dang iai bteng ban leh haduh mynta. U la shah kem bunsien hynrei namar ba ym don jingthoh ban long ka sakhi sabut, u shu lait suk noh khlem kano kano ka jingpynshitom lait noh tang ka jingshah set katto katne por katkum bym pat dep ban bishar da ka iing bishar.