Maham ka RBYF halor ka jinglehmon ki nongtrei sorkar ha ka thain Ri-Bhoi Sepngi

Nongpoh,17 Nailar:
Namar ka jingeh kaba la iakynduh da ki paid nongshong shnong ka thain Ri Bhoi Sepngi, tang na ka daw ka jinglehmon bad ka jingbymshimkhia da ki nongtrei ha ki ophis sorkar bapher bapher, ka Ri-Bhoi Youth Federation (RBYF) Western Zone, ka la pynpaw iaka jing sngewkhia kaba jur bad buh ruh ia ka jingmaham halor ka jingpep trei bad ka jingbymwan trei ha ka por kaba biang ia baroh ki nongtrei sorkar kiba don ha katei ka thain.
Kat kum ka kyrwoh ba la phah da u Bah Active Pator, President ka RBYF Western Zone, la ong ba ka jingleh mon da ki nongtrei sorkar ha katei thain Ri-Bhoi Sepngi, ka buh ia ki paidbah nong shong shnong ha ka jingeh kaba khraw, khamtam lada ki leit ban donkam sha ka ophis jong ka Jirang C&RD Block bad kaba kham pynsohsat eh ka long ia kito kiba wan na ki shnong ba kham shajngai.
Shuh shuh, la pynpaw ruh ba ym tang ki nongtrei ha ki ophis sorkar kiba lehmon, hynrei don ruh napdeng ki nonghikai skul, ki bym shimkhia ia la ka jong ka kamram da kaba ki pep skul bad lehmon ha katei ka thain, ha kaba kane ka jinglehmon jong ki nonghikai skul kan ktah pat ia ka jingpule jong ki khynnah skul, namar lada khah khah ka pep kan shem shitom ruh ban pyndep ia ki course jong ki khynnah ha ka por kaba biang.
Kumta khadduh eh, ka seng nangne shakhmat ka maham ia baroh ki nongtrei sorkar bad ki nonghikai skul, ba kim dei ban lehmon da kaba pep trei bad pep skul lait noh tang ha ki kam bym lah kiar, namar kane ka jinglehmon kan ktah pat ia ka thain hi baroh kawei.