Dawa ban pyndep ka jingkieng Phodthre

Nongstoin, 20 Naitung :
Ka seng Federation of Khasi Jaintia & Garo  people (FKJGP), Nong stoin Circle kala pynbor ia ka sorkar khamtam ia ka tnad PWD (Road), ba kadei ban pynsted bad pyndep noh ia ka jing pyntrei ia ka jingkieng  kaba don ha ka Phodthre. Na ka liang jong u President ka FKJGP Nongstoin Circle, u samla Chandra Nongdkhar u la iathuh ba katei ka jing kieng kaba sdang na ka ophis Irrigation kan pyn iasoh  ruh ia shi bun tylli ki shnong kiba kynthup ia ka Tiehsaw  Mawrusyiar bad khamtam kan iarap ruh ban pyllait na ka jingdheng kali ha sor Nongstoin.
Shuh shuh u tei u samla u la ong ruh ba ka jingpynsahteng ia katei ka jingkieng da ka tnad PWD kala long shisha kajingduh nong kaba khraw bad kala long ruh pynban kum kajingpynlut kai ia ka pisa paitbah, ha kaba katei ka jingkieng namar kala shu sah khongreng bad don tang u wei u paia mynta la kumba khad hynriew snem ei ei. Ha kaba iadei bad katei ka bynta na ka liang jong ka seng Federation  Khasi Jaintia & Garo  people (FKJGP)  Nongstoin circle, kala leit ruh ban iakynduh bad mudui ia katei sha u secretary ka tnad  PWD (R&B) Shillong  na kabynta ban shna pyndep noh ia  katei kajingkieng.
“Ia katei ka jingkieng la shna ha ka por ba pynlong ia kajingiaseng KJP Assembly kaba nyngkong duh ha ka Balang Presbyterian New Nongstoin , hynrei kaba sngewsih ba haduh mynta ka klem pat poi sha ei  sha ei bad kala long pynban ka jingleh rain ia ka tand PWD kaba la shuh ieh khongreng hapoh ka district head quarter’ ong u samla Nongdkhar. Kumta na ka liang jong ka seng ka kyntu jur ia ki bor ba dei peit khamtam ia ka tnad PWD ba kan leh ei ei noh kham kloi ha kaba iadei bad katei ka jingkieng khnang ba kan long ka jingmyntoi ia ki paidbah jong ka thain hi baroh kawei.