Pdiang ka High Court ia ka ujor ka Dikkanchi pyrshah ia u Conrad

Shillong, 8 Naitung:
Ka Meghalaya High Court mynta ka sngi ka la pdiang ia ka jingujor ka kyrtong ka Congress, ba la shah rem ka Dikkanchi Shira ha ka elekshon MP pyrshah ia u kyrtong ka NPP ba la jop ia ka elekshon u Conrad K Sangma halor ka jing kynnoh ba ka sorkar kam shym la pynbiang ia ka Utilization Certificate (UC) sha ka sorkar pdeng ia ka jingpyntreikam ia ka MGNREGS ha ka por elekshon.
Ha ka jingpynmih ia ka hukum, u nongbishar Justice SR Sen u la ong ba la phah jingpan jubab sha u nongshah mudui balei ia kane ka jingujor ym dei ban pdiang lane kano kano ka hukum ym dei ban pynmih kumba shem ba ka long kaba biang bad iahap. Ka kashari ka la ong ba shim biang ia ka jingbishar hapoh lai taiew ia kane kam.
Ka khubor ka iathuh ba ka Shira kaba dei ka tnga jong u Myntri Rangbah u Mukul Sangma ka la ujor da ka dorkhas pyrshah ia u Conrad halor ka jingkynnoh jongu ba ka sorkar kam shym la pynbiang ia ka UC sha ka sorkar pdeng halor ka jingpyntreikam ia ka skhim shi spah sngi ha ka por elekshon ha ki bnai ba la dep.
Katkum ka khubor, u Conrad u la kynnoh ba ka sorkar kam shym la pynbiang ia ka UC ia ka jingpyntreikam ia kane ka skhim kaba la pynlong ban shah bat haduh T. 300 klur ka pisa na ka sorkar pdeng.