La iohsei biang sa 16 ki metiap, dangsah sa 4 tylli

Jowai, 16 Jylliew:
Ki pulit, ki BSF bad ki riew paidbah napoh ka thain Sonapur, ki la ioh ban sei sa 16 tylli ki metiap jong ki lanot hap bus ha Sonapur mynta ka sngi katba la ngeit bad ki dang don sa 4 tylli ki metiap kiba dang sahkut hapoh ka synrang kaba katei ka bus ka la hap naduh ka meit sngi ba-ar.
Kat haduh mynta ka sngi, la iohsei haduh 25 tylli ki metiap bad la ioh ban pyllait im 9 ngut bad ar ngut ki dang don ha tmier. Uwei na kiba la ioh pyllait im um shym la leilei satia.
Ia ki 4 tylli ki metiap kiba dang sah yn sa sei la shai ka sngi. Ka kynhun iarap pyllait im naduh ki pulit bad ki shipai BSF, ki la hap ban pyndonkam da ka kor ot nar (Iron Cutting Machines) ban ot ia ki nar kiba la tapmoh bad ban ia ki met jong ki lanot khnang ban iohsei ia ki.
Ha katei ka bus ki don haduh 38 ngut ki briew kynthup ia u driver bad ia ki 2 ngut nongiarap (Handiman), la ong ka thyllong khubor.
Napdeng kitei, ki don haduh 9 ngut ki pulit CRPF ha kaba 3 ngut ki la mynsaw bad 6 ngut ki la iap. Napdeng kitei ki 6 ngut, la lah ban ithuh tang san ngut.
Napdeng kiba la iap u don ruh u nongtrei ha ophis u SP ka Silchar. Utei u nontrei ka Ophis SP, Silchar u dang mut ban leit sha Guwahati High Court, ha ryngkat ki kot ki sla sorkar.
Na ka liang u SP ka EJH, u bah S. Thamar u la ong ba ha ka jingshisha ym don shuh ki metiap ha katei ka jaka ba hap ka bus namar ladep sei lut mynta ka sngi.
“Ngim pat lah ban ithuh lut namar ki kwah ban sei lut shwa ia ki metiap bad lashai ngin sa pyndep lut ia baroh ki jingdonkam”, la ong u bah Thamar.