Yn wan Shillong U CP Joshi, hadien ar taiew ban ia kynduh ia ki MLA

Shillong, 14 Jylliew:
U President jong ka Meghalaya Pradesh Congress Committee (MPCC) U bah D D Lapang bad ka Working President ka Debora Marak mynta ka sngi kila ia kynduh ia u AICC Secretary ba dei peit ia ka jylla Meghalaya u CP Joshi ha Delhi bad ki la ia kren ia ki kam sain pyrthei ha kane ka jylla. Haba ia kren bad kawei na ki lad pathai khubor ha ka jylla, na ka liang ka Debora ka la ong ba kane ka jingiakynduh jong ki ka long kum ka jingai khublei ia u ba u dang shah jied thymmai kum u Secretary ba dei peit ia kane ka jylla Meghalaya.
Ka Debora Marak ka la ong ba ha kane ka jingiakynduh ki la ia kren kumno ban pynkhlain ia ka seng Congress ha kane ka jylla ban pynkhreh ia ka elekshon sha ka Iing Dorbar Thawain ka ban long ha u snem 2018.Ha kane ka jingiakynduh kim shym la ia kren ei ei halor ka jinglong jingman jong ka sain pyrthei ha kane ka jylla hynrei ka long beit tang halor ka phang ban pynkhlain ia ka party.
Ha kaba ia dei bad ka jingdawa ban bujli nongialam ka la ong ba kim shym la ia kren ei ei ia kane ka bynta ruh hynrei la iathuh ba u Secretary jong ka AICC u CP Joshi hapoh ka ar taiew un sa wan sha Shillong ban ia kynduh ia ki MLA ka party baroh ban tip ia ka jingsngew ka jong ki.