Hadien 25 sngi lap ia ka kali ba shah rahbor

Jowai, 13 Jylliew:
Hadien 25 sngi la lap biang ia ka maruti Alto 800 kaba don ia u nombar ML 11-1038 kaba la shah rahbor na Khliehriat ha ka 15 tarik u jymmang ha ryngkat ki ar ngut ki shi paralok. La lap ia katei ka kali ha ka 9 tarik ha Badarpur, Assam. Ki pulit ka Khliehriat ki la leit shimti ia katei ka kali na ki pulit ka Assam bad la wanrah sha Khliehriat, katba ia u nongniah katei ka kali u Bren Dkhar ym pat shym la lap haduh mynta ruh. Lah ban pynkynmaw ba ia katei ka kali la rahbor da ki khar Assam da kaba leh mynleh kumba wai kali ban pynleit pynbuh ia ki sha Karimganj ha ka 15 tarik u jymmang bad ia katei ka kali la niah da u Bren bad la donlang ruh u paralok jong u –u Amni paia Sutnga. Hadien ki pulit ki la lap ia ka metiap jong u Amni na Barak-Assam katba ia u Bren pat ym pat lap haduh mynta ruh.