Hap ka trok shariat ha surok Pynursla, mynsaw 2 ngut

Shillong, 9 Jylliew:
Mynta ka janmiet ha ka por 5:12 baje kawei ka trok kaba don ia u nombar ML-0E9893 ka la hap ha kawei ka riat kaba la tip kum ka riat Khoh-iar kaba don ha surok bah ban leit sha Pynursla. Katei ka kali ka dei kaba dang wan phai napoh Nongtalang ban leit sha Shillong. Ha katei ka jingjia 2 ngut ki rangbah ki la mynsaw jur, bad la pynkit ia ki shapoh Civil Hospital, Shillong.
Katei ka trok ka la hap ha ka riat kaba jrong kumhba 100 mitar eiei na surok bah bad la iohi ia katei ka jingjia da ki nongniah kali kiba iaid lyngba katei ka surok. Tang mar ia iohi ia katei ka jingjia katto katne ngut ki rangbah ki la hiar wut wut ban leit iarap ha kaba la don ruh kiba hiar sha riat ban leit sei ia kiba mynsaw.
Uwei na ki mynsaw uba ki rangbah na katei ka thain ki la ioh sei u dei u bah Franko Marbaniang uba shong basah ha Lait Mawiong-Laitlyngkot katba uwei pat uba la sei hadien ka jingwan poi ki pulit u dei u bah Lamkupar Kharkongor uba shong basah ha Mylliem-Syllai U Lor. Katkum ka jingiathuh ki sakhi kiba donlang ha katei ka jaka la ong ba katei ka trok ka la pra phum.
La iathuh ba nyngkong eh la sei da ki riew paidbah ia u bah Franko bad la pynkit ia u da ka Ambulance kaba wan napoh Pynursla sha CH Shillong bad kham hadien hadien ba la wan poi sa ki pulit ka Pynursla PS la pynkit pat sa ia u bah Lamkupar da ka kali pulit. La ong ba katei ka kali ka dei kaba dei trai u bah Sounder Strong Cajee na Mawlai-Nongkwar.