Ngim pdiang ban pynlong langkñia ia ngi ki balang:Rangbah Katholik

Shillong, 13 Jymmang: Haba ia kren bad ki nongthohkhubor mynta ka sngi ki nongialam na ki balang bapher bapher ki la pynpaw ba kim shym la sngew syier satia naba ki don ki kot ki sla kiba biang kiba long ki sakhi ban pynshisha ba ki long trai katba ki dang pyndonkam ia kitei ki jaka.
Tang mar ia wai ka jingialang u Rupang u la ioh ban ia kren bad uwei na ki nongialam rangbah jong ka balang Katholik na Mawlai u bah Lenus Shadap ban ia kren kham bniah shaphang ka jingioh lum jingtep ka balang Katholik Mawlai ha ‘law Syiem. Haba ia kren bad u Rupang u rangbah Lenus u la ong ba u Acting Syiem ka Hima Mylliem u la khot jing ialang ia ki mynta ka sngi naba ki kwah ban tip hato ka jaka ba ki ioh dei kaba ki shu thied ne kaba lashu ai sngewbha ia ki, “Ki la ai ksai ba mynta kam pat long ban ong ai ne ym ai, ngi na ka balang te ngim pdiang ia kata, lada ki thmu ban shim biang ngin ym shah,kam lah ban long ba kaei kaba phi la dep ai phin shim biang” ong u rangbah Lenus.
Ha ka jingiakren kaba tang bad u Rupang utei u rangbah u la ong biang, “Ngim tip ia ki kam pohing ka hima Mylliem,ngim tip phi ia dei jingmut ne phim ia dei ruh,hynrei ngi kum ki khun ki hajar ngi tip beit ba u Syiem dei u khliehduh ka Hima Mylliem,phimlah ban ong ba ka jingai u Syiem dei kaba shu bakla,u syiem Francis mynshuwa u ai jaka lum jingtep ha kano ka dur ki ong mynta ba u Syiem (Latho) um lah ban ai” ong u biang u bah Lenus.
Shuwa ban ia kren bad u Rupang haba ia kren bad kiba bun ki nongthohkhubor u bah Lenus u la ong ka hima Mylliem kam lah ban pynlong langkñia ia ki balang Kristan, “ Kim lah ban shu pynlong langkñia ia ngi ki balang Kristan,don ki myntri kiba ong to ngin sa ia pyrkhat la ngin ai ne ngim ai-kata ka jingkylli kan ym mih shuh,ngi la dep siew ka pisa-lada ki shim biang na ngi-ngi don ruh ka hok ban leit sha Court” ong u bah Shadap.
Shuh shuh utei u rangbah Katholik na Mawlai u la ban biang da kaba ong “Shisien ba la ai-la ai,ym lah ban shim biang,ka jingbym don rikod ka Hima Mylliem ngim lah ban tuklat ka dei ka kamram jong ki ban pynbit pynbiang,ngim lah ruh ban tuklar ki thep shano ka pisa –em ngim lah ban tuklar ia kata” u la ong. Utei u rangbah u la batai ba u la ioh jingtip ba naduh ka por u Syiem Francis ka hima Mylliem ka la ai jaka sha Pynthor “Bad kaei kaba ngi tip ruh ka long ba u Syiem ka Hima u don ka hok ban ai jaka sha ki khun ki hajar haba ki donkam,dei ha katei ka nongrim ba ngi ruh ngi leit pan lum jingtep namarba katba nangmih ki sngi ka balang ka nangroi,ngi donkam lum jingtep bad haba ngi leit pan u Syiem u la ai ia ngi hangtei ha Mawroh kaba heh shi akar tam” iathuh u bah Lenus uba la iathuh ba la thew la woh bad la thoh la tar ruh ia katei ka jaka kaba ka balang ka ai sngewbha T.18 lak tyngka da kaba shu lum pisa na ki para ba ngeit.
Lah ban kdew ba katkumki kot ki sla ba la pyni da u bah Lenus ka Balang Katholik Mawlai ka la ioh lum jingtep na ka Hima Mylliem ha ka 19 tarik u lber, 2013 ha kaba la soi ruh ia ka jingthoh ba ai sngewbha da u Pa’iem Latho Manik Syiem u Syiem ka Hima Mylliem kaba la kdew ba la pdiang ia katei ka kot da u Phadar Roland Kharkrang, Parish Priest Mawlai, Immaculate Conception Church,CMC Mawkynroh Mawlai Parish Priest.
Haba ia kren pat bad u Tymmenbasan ka Balang Presbyterian na Mawlai u Tbn. Dr.B.H Kharlukhi uba dei ruh u Secretary ka Balang Presbyterian Mawlai u la ong ka balang Presbyterian ka ioh jaka 44,100 sq.ft bad ia katei ka jaka la ia thoh ia tar ha ka dur jingai sngewbha ryngkat ki kyndon kiba u Syiem u la buh kiba ong ba kim lah ban die pateng shawei,bad lada kin ym pyndonkam shuh ia ka jaka ki hap ban pynphai biang sha ka Hima, “Ngi sngewthuh ba ka pisa ba ngi ai sha u Syiem ka dei kaba rit haba ia nujor bad ka jingheh ka jaka” ong u Tbn. Kharlukhi uba la iathuh ba ka balang ka ai sngewbha T.6 lak tyngka sha ka Hima kum ka dak ka jingiaburom lang. Haba la kylli kumno pat u sngew mynta la ka don ne-em ka jingsngew syier ioh ba kin shah knieh noh ha ka Hima hadien ka jingwan u Syiem thymmai, “Ngim sngew syier namarba ngi la don ki kot ki sla kiba biang ba ngi la ioh na ka Hima,ki don ki pud sawdong ruh” ong utei u tymmenbasan.