New Delhi: Ka jingleit on thang ia U Arun Jaitley, kan long lashai ka sngi, ha ka por 4baje nohsngi, ha Nigambot Chat, ha New Delhi. La iathuh ia katei, da U Suddhanshu Mittal, u nongialam ka seng BJP.
Yn rah ia ka met jongu lashai ka sngi, naduh ka por 10baje mynstep ha ka ophis jong ka seng BJP ha New Delhi, ban ailad ia kito kiba kwah ban leh burom khadduh ia utei u nongialam jong ka seng, ong ka khubor.
Ki nongiakhih ha Hongkong, kiba dawa ia ka synshar paidbah, ki la ia kynad bad ia pyni bor mynta ka sngi bad ki pulit.
Ki pulit jng ka Hongkong, ki la siat da ki lyer pynsat khmat bad nangta ki la bom da ki lathi ia ki nongiakhih paidbah, katba ki riew paidbah ki kawang da ki maw, ki bitor bad ki siej sha ka liang ba don ki pulit mynta ka sngi.
La iathuh ba na kitei ki nongiakhih paidbah, kiba riam iong, ki la shah kem ha ki pulit kiba teh lakam ia katei ka jing ia kynad.
New Delhi: U Rahul Gandhi, nongialam ka seng Congress lem bad 11ngut ki nongialam jong ki seng sain pyrthei bapher, ki la shah beh noh mynta ka sngi, na kad liengsuin ha Srinagar, ha kaba la pynphai noh ia ki sha Delhi, ong ka khubor.
Na ka tnat Information and Public Relations Department jong ka sorkar Jammu and Kashmir, ka la pyntip hynnin ka sngi, ba ki nongialamsain pyrthei, kim dei ban leit jngoh ia ka Srinagar, namar ba katei kan pynthut ia ki riew paidbah, namar ba ka sorkar, ka don ha ka jingiada ia ki riew paidbah, na ka jinghiar thma jong ki briew kiba na sha shiliang u pud.
Kito kiba leit lang bad U Rahul, sha Srinagar, ki long ki nongialam jong ka CPI(M), CPI, Rashtriya Janata Dal, Nationalist Congress Party, Trinamool Congress bad ka DMK.
U Ghulam Nabi Azad bad U Anand Sharma, ki dei ki arngut ki nongialam ba rangbah jong ka seng Congress, kiba la leit synran lang ia U Rahul sha Jammu and Kashmir.
U Azad kham mynshwa, ula shah beh ha kad liengsuin ha Jammu bad dang ha ha ka sngi hat majai ba ladep ruh, ula shah beh bad ula hap ban leit phai biang sha Delhi.
Shillong:Ka All Adhoc School Teachers Association jong ka Jylla, ha ka jing ialam jong u bah Kenneth Shadap, u lah iathuh ba ki don bun ki jing eh ki ba ktah ia ka pule puthi ha ka jylla, kumta lah donkam eh ban seng syndon ia ka Education Constitution ban wad bniah ia ki jing eh ki ba wan sha khmat.
Lyngba ka jing seng ia ka Education Constitution ki Nonghikai Adhoc kim donkam shuh ban leit sha ing bishar, lada don kano kano ka jing iakajia hapdeng ki kiba donkti ha ka kam hikai bad ka education Constitution kan peit ruh ia ki syllabus jong ki khynnah hapoh skul.
Ki nonghikai adhoc, ki dawa ruh ban kyntiew ia ki member ba rim jong ka Adhoc sha ka deficit system jong ka Meghalaya. Ka association ka lah ong ruh ba bun ki nonghikai adhoc ki shu kamai tang ban im ja kpoh bad lada pang shitom, bun na ki ki shu pan ram na ki wei bad bun na ki, kim banse ban die ia ki jaka puta ba ki don.
Ka Association ruh ka lah dawa ban thung noh da ki nonghikai na bynta ka subject hindi naduh class six haduh ten bad ka tulop ruh ka dei ban ia kajuh bad kiwei ki nonghikai kiba shim ia ki wei ki subjek.
U bah Kenneth u lah iathuh ba ka seng kan sah ia kynduh ia u Ramdas Athawale ha ka 28 tarik u Nailar ban pynsngew ia ka jing eh ki nonghikai Adhoc ha ka jing ialang ka ban long ha madan Malki ha ka jing iadon ryngkat lang u myntri rangbah ka Jylla. Kumta na ka liang ka Association ki khot sngewbha ia baroh ki nonghikai Adhoc ba kin wan ban shim bynta ha kane ka sngi ba kin ioh ia mir jing mut lang ia ki jing eh jong ki.
Nalor ki Adhoc ki nong trei ka EMRI108 ruh kin don bynta lang ban pyn ioh sngew ia ka jingeh jong ki sha u Union Minister u Ramdas Athawale.
Shillong: Ka jingbiah pathar ha nongbah Shillong ka la long kaba ikhlem akor shisha.
Ym lah ban len ba ka jingbiah pathar ka jyllei bha ha ki jaka paidbah kum ha ki sem ap bus, ha ki kynroh ka Hospital, ki kynroh dukan, ki ophis sorkar, ki jaka iew bad kumta ter ter.
Nongstoiñ: U MDC ka Rambrai Jyrngam Constituency u bah Bajop Pyngrope myn hynnin ka sngi ka 23 tarik u Nailar u la hiar sha ka shnong Kyrdum kaba don sha ki thaiñ Nonglang na ka bynta ban aiti ia ki dulir khyndew jong ki nongshong shnong ka shnong Kyrdum ia kaba u la iarap ban pynregister.
Ia katei ka jingialang sam dulir la ioh ban pynlong hapoh ka Iing Dorbar jong ka shnong Kyrdum ha ryngkat ka jingiadon lang ki nongshong shnong bad kumjuh ki trai jaka kiba dei hok ban ioh pdiang ia kitei ki dulir khyndew ia kaba la dep ban pynregister.
Ha katei ka sngi na ka liang jong u MDC ka Rambrai Jyrngam Constituency u bah Bajop Pyngrope u la ioh ban aiti haduh 45 tylli ki dulir khyndew ia kaba u la dep ban pynregister hapoh ka District Council bad u la pynsngew ruh sha ki paidbah katei ka shnong ba ki dang don shuh shuh ki dulir jong ki paidbah ki bay m shym patla lah ban pyndep hynrei u la kular ban iai buddien.
Shuh shuh u MDC u la kyntu ruh ia ki paidbah ki bym pat ioh ban register ia ki khyndew sha ka District Council ba kin mih sha khmat da kaba kin pynbit pynbiang ia ki jingdonkam baroh sha u khang ba un lah ban pyndep shuh shuh ia ki ba dang sah.
Haba ia iakren bad ki nongthoh khubor hadien katei ka jingialang sam dulir na ka liang jong u MDC ka Rambrai Jyrngam u la ong ba ka jingthmu hi ban pynregister ia ki jaka ki pata jong ki paidbah nongshong shnong katei ka thain ka long ban nang pynskhem shuh shuh ia ka jingling trai ha ka khyndew ka shyiap khamtam ba kitei ki jaka ki dei kiba don ha khappud bad ka Jylla Assam.
Shuh shuh u la ai khublei ruh ia ka District Council kaba la shah ban register ei ia ki khyndew jong baroh ki shnong kiba don ha ki thain khappud bad u la ong ruh ba lehse lada jia ba ka don ka jingkyntur pud jong ka Assam katei ka dulir kaba ki shnong kila ioh ban register lehse kan long kum ka atiar kaba ieng bad pynshisha.
Ha kajuh kapor u tei u MDC u la la kyntu ruh ia ki paidbah, ki Hima ba kin mih shakhmat ban shim kabu ban register noh ia ki jaka ki puta sha ka District Council namar kum u nongmihkhmat u donkam ka jingiatreilang bad ki paidbah bad ha kajuh kapor u la kyntu ruh ia kiwei pat ki jaka na kiwei ki Constituency jong ka Jylla ba kin shim ia katei ka kabu ban register noh ia ki jaka ki jong ki sha ka District Council.
Na ka liang jong u MDC u la ai jingmut ruh ia ka District Council ba kadei ban thaw noh ia ka ain ka ban pyrkhing noh ia ka jingiadie ia thied khyndew hapdeng jong ki nongshong shnong ka jylla namar ba kumba ka long ha kine ki sngi kiba mynta ki briew kiba riewspah ki lah ban thied jaka katba ki mon bad kane lehse kan sa pynlong shisien ka sngi ba kiba duk kin nym ioh shuh ban thied jaka wat tang shi nongrim iing ruh.
Shillong: Ka KSU Mawlyntriang Unit hynnin ka sngi, ka la ioh ban leit jurip kyrpang ia ka skul Nongsynrang L.P School,Mawlyntriang.
Ha kane ka sngi ka Seng ka la ioh ban ia kynduh ia ki Nonghikai bad ki nong pyniaid ka Skul bad katkum ka jingleit jurip na ka liang ka seng la shem ba ka kamra klas ba pynlong skul ka la jot rathai naduh ki tin tap bad ki kynroh bad paia ba kyrshan ia kane ka skul ki la orpait lut rynghang bad kane ka buh ka jingma shibun ia ki khynnah ba pule hapoh ka tei ka skul namar lada jur lei u slap ki nonghikai ki hap ban phah mih noh ia ki khynnah napoh kane ka kamra bad kaba kham sngewsih ka long ba wat ka paiñkhana na bynta ki Khynnah ba pule ha kane ka skul kim shym don, bad ka phyllaw skul ruh ka long kaba khim ha kaba ki khynnah ki hap ban ia ieng assembly hapoh kamra klas, ki klas ruh kiba don ha kane ka skul ki long tang naduh Nursery haduh Klas 5.
Kumta na ka liang ka Seng ka kyntu jur ia ki briew kiba halor ba kin phai khmat lem na ka bynta kane ka skul khnang ba kum ki khynnah ba pule ha kane ka skul kin ioh ka jingshong shngaiñ bad ba kin lah ban pynleit jingmut na ka bynta ha ka jingpule.
Ha kane ka jing leit jurip la ialam da u Educational Secretary ka Unit u samla Wallam Ryntathiang bad ka jingdon ryngkat lang u President ka unit u samla Wanbiangstar Rani ha ryngkat ka jingdon u Secretary unit u samla Jessterfield Ryntathiang bad ka jing synran lang u Education Secretary ka KSU Nongkhlaw Circle u Samla Lotkaldinal Mawblei.
Nongpoh: Ka District Magistrate, jong ka Ri Bhoi District, ka la pynbna ba ka la pynjari da ka kyndon 144 CrPC, kaba long ruh kum ka jingmana bad khang pyrshah ia baroh ki briew ki bym pat ioh jingbit ba kim dei ban leit hajan ka Weigh Bridge ha Narang ne ban shong ha ki kali bad ban ieng hajan jong katei ka Weigh Bridge.
Na ka bynta jong kito ki trok kit Dewiong, la shah tang ia u Nongniah bad ia u Nongbud ba kin shong ha kali na ka bynta ban iaid lyngba jong katei ka Weigh Bridge.
Kumta hadien kane ka jingpynbna, baroh ki kali kit dewiong ki dei ban iaid lyngba katei ka Weigh Bridge bad kino kino kiba leh pyrshah ne iaid lait na katei ka Weigh Brige kin san gat ha ka jingshah pynshitom kat kum ki kyndon ain.
Shillong: Ka jingialang jong ka Board jong ka Meghalaya Tourism Development Corporation, kaba long hynnin ka sngi, ka la rai ban aiti ha ki pulit ba kin tohkit, halor ki jing pynmih khubor bapher ha ka social media ha kine ki bun bun taiew ba ladep, ha kaba la thoh bad pynjah burom ia ka Corporation.
Ka Board, ka la kyrpad ruh ia ka SP, East Khasi Hills, kaba dei kawei na ki nongshah khot kyrpang, ba kan pynlong ka jingtohkit kaba sani bha halor katei ka jingmih jingthoh kaba har rukom.
Shillong: U nong ialam jong ka liang pyrshah u Dr Mukul Sangma u la thalain ia ka Sorkar, namar ba ka ong ba ka Jylla Meghalaya kam da donkam kyrkieh ia ka jing thep kam pulit, namar ba Jylla mynta ka lah don ha ka jing shong shngaiñ naduh mynta u snem bad kam long ka ba kyrkieh ban thep ia ki kam ba lait ha ka tnad pulit.
Hynrei katkum ka jingkynthoh jong u nongialam ka liang pyrshah u Dr. Mukul Sangma u la ong “Ka kam ki pulit kam dei tang ban teh lakam iaki kam lehnoh hynrei dei ruh ban peit iaka iaid ka ieing ka leit ka wan ki paidbah,ka jylla ka donkam iaki pulit khamtam ban teh lakam ia ki dawai pynbuaid kum ki drugs bad ruh ban peit ia ka jingshah thombor ki kynthei bad ki khynnah.”
U la bynrap ruh da ka ba ong “Ka jing jia ia tyngkhuh kali ka ba khah khah ka ju jia na ki por sha ki por wat ha dien ka jingshna bha ia ki surok ha ka Jylla.Ka Sorkar Jylla ka dei ban shna ia ki ain (road safety)ki ba lah ban teh lakam ia kane, ka Sorkar Jylla ka dei ban peit ia ki nongniah kali ki ba niah khlemakor bad ai bor ha ki pulit ba kin lah ban teh lakam ia ka jingshong shngain.”
“Pynban ka sorkar Jylla dangshen ka la ong ba kam pat kyrkieh ban pynrung kam pulit na mar ba ym don shuh ki kam lehnoh ha ka jylla wat la ki bun ki kam ki ba lait ha ka tnad pulit, ka tnad pulit ka long kaba donkam bha ym tang ban ialeh ia ki lehnoh.”u la ong.
Bah RM Shabong
Ka HYC, ka la ioh da ka kyntien kaba siat jngai bha, ia U MLA ka Mawhati bad kata ka long, haba ka ong “wat ngop ia ka kper tyrso” bad katei ka jingkren, ka pyn kynmaw shaphang ka khana puriskam jong u klew bad ka sngi bad kumno ba u klew, ula iap bieit ia ka jing shat jingshai ba khriak khriak jong ka kper tyrso bad hangta, ula her wut na ka rynsan jong ka bneng.
Ka kper tyrso, haba iakren madan noh tiak, ka dei kaba la ju pyngngop ia shibun ki riew sain pyrthei bad katei ka la ju jia, ha ka jingmih vote ki bym dei ban mih, ka jing ioh myntoi, ki bym dei ban ioh bad kumta ter ter bad ka dei hi ka kper tyrso ruh, kaba pynduh noh ia ka jingmut kaba nyngkong, ba ka Meghalaya, ka dei ka jylla rilum lane kaba mut ba ka dei ia U Khasi, U Jaintia bad U Garo.
Ki Lalung, la sngewthuh, kumba ki don 4hajar vote bad lada ki don 4 hajar vote, kumta khlem pep, kin don ka jingkhein briew, kaba shiphew hajar antad eiei bad kumta kim dei shuh, kiba khyndiat bad hangne, ka ju mih ka kyntien ha ka politiks, kaba ong “vote bank” lane ka jing kamai vote bad ngim tip, la U MLA ka Mawhati, uba dang samla, u thew sha katei ka lain ne ioh lehse, u don da kawei pat ka jingmut kaba beit bad kaba shisur.
Ngin nym ong shuh ia kaei kaba dei bad ki Lalung, hynrei ngi iohi ba ka jingiakren ha kine ki sngi, ka mih ba ki la jyllei than, kita kiba khot Scheduled Tribe ialade, ha kaba ki nong Assam ruh ha Meghalaya, ki dei ki Scheduled Tribe, ki nong Mizo, ki nong Arunachal bad sa kiwei kiwei kiba bun bah, ki kylla Scheduled Tribe lut ha kane ka Jylla bad ka jingmih kyrteng jong ki Lalung, ha kaba kum kane ka por, ka pynthut pynban ia ka phang baroh kawei.
Ka Meghalaya, kam lah ban leh khunruid, ia ki trai shnong, kiba don ha kane ka Jylla, tangba ka donkam da ki ain kiba shai bad kiba biang bha.
Kaba ijli tasam hangne, ka long ba ki trai shnong, lada ki dei ki dkhar, ki lalung, kiwei pat ki jaitbynriew, ba kim ioh ia ki lad ki lynti, katba kiwei pat kiba wan na Silchar, na Karimganj bad na kiwei pat ki bynta bapher, ki la knieh lut ia ka hok jong ki trai shnong ka Ri Khasi Jaintia.
Shillong: U bah AL Hek, myntri ka koit ka khiah ka sorkar Jylla bad uba dei uwei na ki nongialam ka seng BJP, u iathuh ha kawei ka kotkhubor phareng hynnin ka sngi, ba ka kynhun MDA, kan iakynduh ha ka 27tarik Nailar 2019, na ka bynta ban iakren ia ka elekshon Speaker jong ka dorbar Jylla.
Ha katei ka sngi, la sngewthuh ba ka MDA, kan jied ia uwei pat u briew, uba bit ban shimti ia katei ka shuki lamphang dorbar Jylla bad la sngewthuh ba ynda haba ka MDA, ka la shim ia ka rai, ka BJP, kan sa pyrkhat ia u briew jongka, la u don ne em, uba bit ban shimti ia ka shuki lamphang dorbar.
Ha kaba iadei bad ka elekshon shiteng samoi ha Shella, U bah Hek, um pat pynthikna satia, la ka BJP, kan iakhun ne em, hynrei, ula pynsngew ba kum ka seng heh jong ka India, ka dei beit ban sei ia u kandidet jongka, ha kane ka kynti ruh.
Ha ka elekshon MLA ba dang shu dep, ka BJP, ka la pyniakhun ia U bah Jrop Sing Nongkhlaw na katei ka Constituency, ha kaba ula ioh 3,390 vote.
Kum uwei naki nongshong shnong jongka shnong kongthong kaba hap hapoh ka thain khatar shnong nga nga kwah ia ka ban iatei ia phylliew jingmut katto katne katba lah ei ka ha kaba iadei bad ka Jingrwai Iawbei.
Ia ka Jingrwai Iawbei katkum ba ngi tip kadei kaba la juh leh ne pyn donkam naduh ka mynnor jong ki mynbarim kaba ngim tip tikna naduh ka snem aiu la sdang bad mano bala sdang nyngkong ban pyndonkam nyngkong iaka napdeng kiba bun ki shnong kiba pyndonkam iakane ka Jingrwai Iawbei, bad katkum banga tip halor ka jingsdang jongki bana nabar ban tip iaka Jingrwai Iawbei nyngkong eh da ki ba nabar jongkine ki shnong kadei na shnong Kongthong ha kaba u wei naki lyngdoh niam jong ka Balang Katholik u Rev. Roland Kharkrang, hakaba i la wan ban ialam ia ka kynhun jongki nongthoh khubor bad PCN kaba dei ka local TV channel jongngi hakaba naka liang ki nongthoh khubor ki lawan hapoh ka jing ialam jong i bah Alan West ha kato ka por, mynba i dang don haka kynhun jongki nongthoh khubor kata ha u snem 2004.
Bad dei naduh kata ka por ba ki briew kiba nabar ki sa sdang ban tip iaka jingdon hakaba la don bun ki local tourist ki foreigners tourist kiba la wanrung hapoh shnong kongthong naduh u snem 2004 haduh mynta ban wan sakhi bad wan sngap hi bad ki don ruh kiba shim iaka hakaba ki pyndonkam hakaba leh research haka jing pule ka jongki hakaba ki babun ki nongshong shnong napoh Kongthong kiba la iadon bynta ban pynphriang lem iakane ka Jingrwai Iawbei shaki kiba kwah ban tip bad iohsngew iakane, dakaba ki nongshong shnong ki rwai ne kynud iakane ka Jingrwai Iawbei haka por ba ki briew kiba nabar ki phah iaki. Bad dei dakane ka jingwan ba khah khah jongki ba nabar shnong hapoh shnong kaba la ktik bad pynlong ia u bah Rothell Khongsit uwei naki samla rangbah na kongthong bad shna iaka travelest nest house daka kynhun ka jong u ka Indigenous Agro Tourism cooperative society (IATCS Kongthong).
Ha u snem 2013 naka bynta ban pynjanai shuh shuh iaka jingdon jongka shnong kongthong iaka jinglong kyrpang ka jongka hakaban ai jingtip iaki briew kiba kwah ban tip kham bniah iaka Jingrwai Iawbei. Bad dei ha u snem 2016 -17 hakaba ki la don ki briew kiba la wan hapoh shnong kongthong hakaban shna syndon kum ka ducomentary film hakaba iadei bad ka Jingrwai Iawbei, hakaba ka kynhun jong i bah Rothell Khongsit kadei ka bynta kum ki nong ak ne nong ai jingtip bad jing pynshai halor kane, bad ka long shisha kaba donbok haduh katta katta hakaba ka documentary film kaba la ai kyrteng “My name is eeoow”kala ioh iaka award naka poh ka ri UK ha u snem 2017. Bad shuh shuh kane kam shym la sahkut tang katne kala poi ruh haduh ka tyndong shkor jong ki nong thaw ain ka ri India bad haduh ba un da rah syndon iakane ka mat haduh ka ing Rajya Sabha dang hakine ki sngi bad khamtam eh ba un wanhiar haduh shnong kongthong dang hakine ki khyndiat sngi bala dep. Te kumta naka liang jongnga ruh nga sngew ban mynjur ba ymdei shisha tang hapoh shnong kongthong bangi pyndonkam iaka hynrei ki bun ki shnong katkum ba nga tip ki leh iakane hapoh ka thain khatarshnong kumba la pynshai ha ki lad pathai khubor hakine ki sngi baki don haduh kumba 20 shnong tam tang hapoh ka thain khatarshnong, bad katkum banga sakhi bad tip iakane ki don ruh katto katne tylli shnong kiba hap hapoh ka Hima Khyrim ruh ki pyndonkam iakane kum ka shnong Wahkhen, Shuthim, Nongblai bad kiwei ruh, hynrei iaka jingjer kyrteng iaka kane ka rukom kynud sur hi ban ai nam daka “Jingrwai Iawbei” kadei tang ha Kongthong kaba ngim tip hakiwei pat ki khot kumno iakane ka rukom kynud sur. Bad nakata kadaw nga sngew iaka ban ong ne iatei lem hangne ba kalong kaei kaei kaba bakla ban ong bakiwei pat ki shnong kin pyrshah iaka ban ainam tang iaka shnong kongthong namar haka jaka ban kin pyrshah nga sngew kum ka jing ai jingmut baki dei ban kyrpad ne ai jingtip shaki bahalor ban pynrung lem iaki wei pat ki shnong haka intangible heritage village lada ka lad ka don dakaba kin pyni lang iaka ei kaba kidon bad ruh hakaba iadei bad kane naka liang jongki ba don bynta ban pynphriang iakane ka Jingrwai Iawbei nga kyrpad bakan ym don ka jing buhrieh iaka jingdon lem jong kiwei pat ki shnong iaka Jingrwai Iawbei kum ba ngi don hapoh shnong kongthong ban ym pynpaw bangi don tang hapoh shong Kongthong.
— Banshanlang Khongsit
U Shah Rukh Khan, uba dei u khlur jong ka Bollywood, ula pyllait paidbah ia ka stamp ba thymmai, kaba kynmaw ia ka jingdap ba 130 snem jong ka kad rel ha Bandra, kaba ha Mumbai, ha ka sngi thohdieng ba ladep.
Haba kren ha katei ka jingialang, U Khan, ula ong “Nga la ju ia luh ia shibun ki samla ha ki kad rel, tangba hangne te ngam pat ju poi bad nga sngew ieid shi katdei bad ngan sa wan biang”.
Ka jingdon bynta jong U Shah Rukh, ha ki kam ialuh samla ha kad rel, ka dei ha u snem 1995, ha ka phlim Dilwale Dulhania Le Jayenge (DDLJ), ha kaba ha katei ka sien, u kum U Raj Malhotra u ia kynduh ia ka Kajol kaba la tip kum ka Simran Singh, ha ka kad rel ha Europe.
Hadien ka DDLJ, ha u snem 1998, ha ka phlim Dil Se, U Shah Rukh Khan, u shoh jingieid syndon ia ka Manisha Koirala, tang namar ba u iohi ia ka, ha katei ka kad rel.
Ha u snem 2013, ha ka phlim Chennai Express, U Shah Rukh Khan, u ia kynduh ia ka Deepika Padukone bad u shoh jingieid syndon ia ka, ha ka kad rel bad kiba bun ki bynta ba la ring ha katei ka phlim Chennai Express, ki dei hi kiba la ring ha ka rel.
Ha u snem 2017, ha ka phlim Harry Met Sejal, U Shah Rukh Khan, u ia ieid samla bad ka Anushka Sharma, ha ka jingleit da ka rel na Prague sha Budapest.
Imphal: Ki pulit jong ka Manipur ki la ioh kurup ia ki table kiba don kumba 40lak tylli, kiba la tip kyrteng kum ki WY (World is Yours), kiba shongdor T.400klur. La ioh kurup ia kitei ki tiar ha ka shnong Phoudel Keirambi Mathak Leikai.
U SP jong ka Thoubal District, U Dr S Ibomcha Singh, haba kren sha ki kotkhubor, u iathuh ba ha ka jing ia treilang bad ki seng samla bad ki seng kynthei, ki la ioh ban kurup ia katei ka mar, kaba remdor shi katdei. U Singh, u iathuh ba ki la don kiba iohi ia katei ka kali, hynnin ka sngi, ba ka iaid ruma shaneng sharum bad haba la ioh bat, la lap pynban da ki droks kiba don ha katei ka kali.
La wan ialam ia ka kali bad u nongniah sha ki pulit ha Thoubal bad la lap ia ki jingsong kiba don 100 song bad kitei ki don 40lak ki WY Tables.
Ki pulit ki la ioh kem ia u nongniah U Mohammad Hussain bad nangta sa kiwei kiba donkti ha katei ka jing khaii bad mar ia ioh jingtip, ki la leit mar mar sha ka kad liengsuin ha Imphal bad hangta, ki la ioh kem ia U Ayub Khan (41), Md Abdul Razak (35) badU Abdul Rahim (33). La iathuh ba U Rahim, u dei uwei na ki nongkhaii ba pawnam tam jong ka pyrthei.
Shillong: Mynhynnin ka sngi, ka KSU Hingaria Unit ba hap hapoh ka jingpeit ka KSU Khliehriat Circle East Jaintia hills, ka la pynsangeh noh ia ka jingker sainar shiah ha khappud India bad Bangladesh.
Ha katei ka sngi ki dkhot ka KSU Hingaria Unit lem bad ki trai jaka ki la leit ban khang noh ia ka jing pyntrei ha katei ka khappud halor ki dawbah ba ki bor sorkar ne ki kompani ba dei peit ia katei ka jing pyntrei ki shu sngap mynthi khlem lah ban siew pyndep ia bai lut ksan sha ki trai khyndew kiba dei hok ban ioh namar ka jingpynjot bad pynjulor ia ki mar rep bala pyntrei da ka NBCC kompani.
Shuh shuh na ka liang ka Seng KSU Hingaria Unit, ka la kren shai naduh kaba sdang ban pyntrei ia katei ka kam da katei ka Kompani ba ka dei ban siew lut sha ki trai jaka, ha kaba iadei bad ki jinglut jingsep bad ki jingjulor ki jingthung jingtep hynrei kaba pyn sngew lynngoh ia ka seng namar ba haduh mynta ka la shu siew tang ia ki katto katne ngut, wat haduh ba ki bor district ba dei peit ia ka tei ka thaiñ ki la leit ban tuklar. Na ka liang DC ka tei ka thaiñ bad ki bor district ki la kular ban phah siew pyndep lut shuwa ia ki ba dang sah, hynrei haduh mynta ka jingpyntrei ka nang iaid shait shait wat haduh ba ki bor shnong ki la leit buh ia ki kyrteng ki briew bad ki jingthung jingtep kiba la shah pynjulor, hynrei ym pat ioh jingsiew eiei ne ym don dak eiei kiba phah jingtip sha ka shnong ne ki trai jaka.
Kumta ka Seng khlem da pynslem haba la ioh sngew ia ka jingud jingnam jong paidbah kiba dei ki trai jaka na ka shnong Hingaria, ka la pynsangeh noh shisyndon ia ka jing pyntrei ia katei ka kam. Na ka liang ka Seng ka la ther tyngeh ba kan ym ai lad satia ia kino kino ki bor sorkar ne Kompani ba kin shu thombor ia ka hok jong ki paradoh para snam, khamtam, lada shu pynjot pynpra ia ka jaka rep jaka riang khlem da siew ia ka bai lutksan sha ki trai jaka.
Ha katei ka sngi na ka liang ka Seng ka la ioh ban ia kren bad u General Secretary, ka shnong Hingaria u samla Garnes Talang bad u ong ba ka shnong kam don jingpyrshah ei ei ruh em Ia ka jingpyntrei ia ka katei ka jing ker saianr shiah, hynrei ka long pat ka ba sngewsih ba ki bor ba dei peit ia ka tei ka jing pyntrei kim patiaw eiei ban siew dep ia ka jing lutksan jong ki paidbah khamtam kine ki kompani ki pyntrei pathar da kaba tam pud wat shaduh ki jaka ki bym iahap shuh ha ka jingthew.
Kumta na ka liang ka shnong kala buh da ka jing kyntu ia kane ka kompani ban trei ha ka jaka ba dei ban trei kumba lathew la woh khnang ban wanrah ka bha ka miat ha ka imlang sah lang jong u paitbah ka shnong bad ka shnong ka ai ka jing kyrshan ba pura ia ka synjam ba ka seng KSU Hingaria unit ka iaid shakhmat na ka bynta ka jing myntoi ki paitbah nong shong shnong, ong ka kyrwoh na U President ka KSU Hingaria Unit u Samla S.S Lamin.
Shillong: Ka Meghalaya ka la jop 3 takma Gold, 3 takma Silver bad 3 takma Bronze ha ka 7th NE Zonal Shooting Championship kaba la long hapoh ka 4th Assam Police Battalion, Shooting Ranges, Kahilipara, Guwahati, Assam naduh ka 19tarik August 2019 haduh 23 tarik August 2019.
Ki nongiasiat baroh ha katei ka jingiakob jong ka 7th North East Zonal Shooting Championship, ki long 242 ngut ki nongiasiat (Target Shooters).
Hadien ka jingpynlong iaka state ranking Championship ha Shillong, ka Shooting Association of Meghalaya(SAM) ki la ioh ban jied katkum point kaba ki ioh (Score) bad phah 23 ngut ki nongiasiat shooters ( 9 Women shooters & 14 Men) bad na kitei Lai ngut ki dei ki junior shooters 2 kynthei & 1 shynrang.
Ha kane ka jingiasiat ka Shooting Association of Meghalaya (SAM) hapdeng ki jingeh baroh ki la lah ban jop Medal bad kaba nang ioh mynsiem ka long ba hynniew ngut ki nongiasiat na ka jylla Meghalaya ki long Balarishisha Rani, Anjali Singh, Toiabha Mylliempdah, Shirley M. Kharbuli, Pynkhraw Kharshiing, Uttam Sinha, Dennyson Kyrsian, ki la ioh ban poi sha ka point (score) kaba ki nongiasiat ki dei ban ioh [National Minimum Qualifying Score (MQS)] ban ioh ia shim bynta ha ki Nationals khamtam ha ka National Shooting Championship competition (63rd NSCC) kaban long ha Bhopal ha u bnai November 2019.
Kine harum ki long ki nongjop bad ki nongioh takma na ka jylla Meghalaya ha ka 7th North East Shooting Championship kaba la long ha Guwahati, Assam.
7 Uttam Sinha – Silver in 10M Air rifle ( Men junior)
Ka jylla Meghalaya kumba ka paw ka don bun ki sap iasiat, hynrei namar ka jingduna ka jingbym don la ka jong ka jaka practice ka jaka pynkhreh iasiat ka long kaei kaei kaba pynkhia mynsiem.
Kumba ka long mynta ki nongiasiat na ka jylla Meghalaya ki donbok la kumno kumno ki ioh ban bat suloi ban practice iasiat teng teng ha ki sngi saitjain(Saturday) bad sngi u Blei (Sunday) ha kat ki por ki kynta ba mang bad ai ki bor pyniaid ka Assam Regimental Center, (ARC), bad ki nongiasiat bad ka Shooting Association of Meghalaya ki iai kyrmen ba ka jylla kan thaw ki lad ban pynbiang noh ki jaka ialehkai bad khamtam ban thied kham bun ki tiar iasiat competition pistol bad competition rifle kham kloi kum shibynta ban ioh sei ia ki sap kiba bun jong ka jylla kum ka lynti ban pynkhreh ia ka kynhun iasiat na ka bynta ka Meghalaya National Games 2022.
Shillong: U Bah LD Suchiang Chief Engineer jong ka PWD ba dei peit ia ki surok u la iathuh ba ki la pynkhreh ban pan jingiarap na ka Wold Bank ban tei kitei ki ar tylli ki jingkieng ha Wah Shella bad Khasiamara kiba hap ha East Khasi Hills District.
Kane ka jingkieng ki long kiba don kam haduh katta katta ym tang na ka bynta ki paidbah, hynrei wat ia ki shipai BSF ban pahara ha khappud bad ka Bangladesh.
U Chief Engineer u la iathuh ba kine ki jingkieng ar tylli ki long kiba don kam haduh katta katta namar kine ki jingkieng ki pyniasoh ia ki bun phew tylli ki shnong ha khappud, ha pdeng ka thain Shella bad Mawsynram.
Ka PWD ha ki snem kiba la dep kala shna ia ka jingkieng ha ka Wah Shella, hynrei kala khyllem ha ka por ba dang pynieng ia ki paia na ka daw jong ka jingkhlain palat jong ka jingtuid jong ka um bala jur palat u slap.Halor kine ki ar tylli ki jingkieng kiba don ha khappud bad ka Bangladesh kiba don kam ruh na ka bynta ka jingiada ia ka Ri, ka sorkar jylla kala pynkhreh ban wad jingiarap na ka World Bank ban tei ia ki ar tylli ki jingkieng ha wah Shella bad Khasiamara kiba don marjan.
Shillong: Ka daw jong ka jing weng noh ia ka jingpynbna kaba ka Sorkar ka la pynbna ha ka 29 tarik u Jymmang 2019 lyngba ka tnad Commerce bad Industry ha kaba ia dei bad ki jaka ba la shim da ka sorkar ban ithuh kum ki “Industrial Estate” bad ia ka ne ka jingpynbna la hap weng noh ha ka 26tarik Naitung 2019, ka dei na ka daw ka jah shilain na ka jingthoh kaba la wanrah ia ka jingsngewthuh bakla.
Kat kum ki thymmei khubor napoh jong ka tnad Commerce bad Industry ki iathuh ba ka jingthmu jong ka ka sorkar ban pynmih ia ka jingpynbna ban khang ia ki khyrdop kiba la buh da ki Hima, ki shnong hapoh ki jaka bala ithuh da ka sorkar kum ki jaka ban don ki karkhana, hynrei ha ka por ba pynmih ia ka jingpynbna ka la jah noh shilain bad kala pynmih ia ka jingsngewthuh bakla bad na ka liang jong ka tnad karkhana ruh kala weng noh namar kala don ka jingbakla.
Ki lad khubor napoh ka tnad Commerce bad Industry, ki la iathuh ba ka jingpynmih ia katei ka jingpynbna sorkar ka long ban khanglad ia ki Gate kiba la buh hapoh jong ka Umiam Industrial kiba la mih haduh lai tylli kiba ka tnad karkhana ka dang wad ban tip ka dei ka jongno. Hynrei ha ka jingjah shilain na kaba la thoh kala wan wanrah ia ki jingeh pynbna ha kaba bun kila pynpaw ia ka jingpyrshah.
Na ka liang jong ka tnad karkhana, haba iohi ia kine ki khyrdop, kiba la mih hapoh jong ka Umiam Industrial area, ka kwah ban khang ia ki bad ba kin nym mih ha kiwei pat ki Industrial Area kiba don ha kylleng ka jylla. Na ka liang jong ka tnad karkhana kan nym shah ban buh khyrdop, hapoh jong ka Industrial Area la ki dei jong ka KHADC, ki Hima ne ki shnong hynrei ia kiba don sha bar jong ka Industrial area kin nym lah ban ong ei ei.
La sngewthuh ba ka tnad karkhana ka sngewthuh shai kdar ba baroh ki jaka ki hap hapoh jong ka Sixth Schedule, lait noh ka European Ward.
Nongpoh: Mynta ka sngi ki pulit ka Umiam Police Station, ki la ioh ban sei ia ka metiap jong uwei u rangbah na Assam, uba la tip kum u Santus Sunar (35) snem bad uba la wan noh iap ialade ha pung Umiam.
Katkum ka jingiathuh da ki Pulit ka Ri Bhoi, la iathuh ba dei ha ka janmiet jong ka 23 tarik ha ka por 6 baje ei ei janmiet, ba utei u bar jylla uba dei na ka shnong Nengrabri, Assam, u la wan noh iap ialade ha katei ka Pung Umiam bad naduh katei ka sngi dei tad hynne ka sngi ba ki Pulit ki la ioh ban sei ia katei ka metiap, kata lyngba ka jingwaniarap da ki pulit ngam na Shillong, la lah pat ban sei.
Ki Pulit ki la iathuh ruh, ba la don kiba iohi ha ka por ba utei u bar jylla, u noh iap nalor jingkieng heh ha Umiam, namar ba u la ngam sha ka jaka kaba kham jylliew, ka la kham shimpor ia ki Pulit ban sei mar mar.